Ինչ լուծումներ տալ սեռական խնդիրներին

[Առողջագետ]

Ես երազում եմ, որ այսօրվա աղջիկը իմանա, որ ինքը Բնության, կամ ասենք ավելի ստույգ, Մայր-Բնության, ուղղակի ժառանգն է, նրա ամենագեղեցիկ և ամենաթանկ ստեղծագործությունը: Եվ դա, անկասկած, իր պատճառն ունի` նրան է վստահված բնության ամենակարևոր ֆունկցիան` զավակ ունենալու Բարձր Առաքելությունը:
Նրա օրգանիզմի խորքում է թաքնված ամենաթանկ օրգանը` արգանդը` ամենահամբերատար, ամենանվիրված, ամենազոհաբերական, ամենահերոսական օրգանը: Չգիտեմ այդ բառի ծագումնաբանությունը, սակայն թերևս ժողովրդական "զավակատուն" բառը ավելի ջերմ է, ավելի լավ է արտահայտում իմաստը; ռուսերեն " матка" բառը ևս ուղղակիորեն կապված է "мать, матерь" բառերի հետ: Ասում են, կնոջ ամբողջ փարթամ, գեղեցիկ մարմինը ստեղծված է այդ օրգանը պահելու, փայփայելու, իր դերի համար հասունացնելու, խնամելու համար, քանզի սա է Կյանքի Բարձր Դուռը: Որպեսզի կինը կարողանա իր այդ Բաձր Առաքելությունը կատարել, նախևառաջ հենց ինքը, ապա և տղամարդը և հասարակությունը պետք է գիտակցեն այս կարևորությունն ու գեղեցկությունը; միայն այդպիսի հասարակությունը կդառնա Բարձր մարդկային հասարակություն. որտեղ կինը կունենա իր դերի գիտակցումը, բարձր արժանապատվություն, կկարողանա պահպանել բնության կողմից իրեն պարգևած խաղաղությունը, համբերատար ու իմաստուն հոգեկերտվածքը, ամբողջական հմայքը: Կարծում եմ ակնհայտ է, որ այսօրվա տղամարդու կողմից և տղամարդու համար ստեղծված հասարակությունը բոլորովին չի նպաստում այդպիսի կնոջ դաստիարակությանը և խնամքին, և մենք ստանում ենք լարված, նյարդային, հուզական, անբնական "գիտություններով" գլուխը լցրած և ապա շարքից շուտ դուրս եկած, հյուծված, հոգնած մի արարած:
Կարծում եմ, ավելի տխուր երևույթ, քան նյարդայնացած, "հունից դուրս եկած" կինը, չկա: Դեռ տղամարդու այդ վիճակը ավելի տանելի է, բայց կնոջը` ոչ: Նա, որ ստեղծված է կյանքը ներդաշնակելու համար, խաղաղություն և սեր սփռելու համար, սկսում է հակառակն անել` քանդել, քայքայել շուրջը սփռված կյանքը:
Ահա ինչի մասին պետք է մտածի այսօրվա կյանքի "տեր" և "օրենսդիր", գենային ինժեներիային և Տիեզերքին "ձեռք" գցող տղամարդը, հակառակ դեպքում վաղը "մարդկային նյութ" չի ունենա իր անսահման հետաքրքրասիրությունը բավարարելու համար:
Եվ ելքը, կարծում եմ, այդքան պարզունակ չէ, ինչպես թվում է. ոչ
այսօրվա պատկերացրած սեռական դաստիարակության մեջ է, ոչ էլ սեռական կյանքը սկսելու տարիքային ազատության մեջ, հակառակը` մտավախություն ունեմ, որ այդպիսի պրիմիտիվ լուծումները ավելի կստորացնեն, այլ ոչ կբարձրացնեն կնոջը:
Այս անգամ սխալվելու իրավունք հասարակությունը չունի, այս մեկ անգամ լուծումները պետք է խորն ու իմաստուն լինեն, չէ որ այս
տղա-մարդկությունը /ի դեպ, այս գտնումը պատկանում է իմ ամուսնուն/ իր ստեղծած կյանքով կանգնած է Բնության "զավակատունը", ապա և կյանքը ընդհանրապես ոչնչացնելու վտանգի առջև:

[ivy]

Եվ ելքը, կարծում եմ, այդքան պարզունակ չէ, ինչպես թվում է. ոչ այսօրվա պատկերացրած սեռական դաստիարակության մեջ է, ոչ էլ սեռական կյանքը սկսելու տարիքային ազատության մեջ, հակառակը` մտավախություն ունեմ, որ այդպիսի պրիմիտիվ լուծումները ավելի կստորացնեն, այլ ոչ կբարձրացնեն կնոջը:

Շատ գնահատում եմ բովանդակալից գրառումը... սակայն կոնկրետ այս մտքի հետ համաձայն չեմ:

Այսօրվա պատկերացրած սեռական դաստիարակությունը չեմ համարում սեռական խնդիրների հարթման պրիմիտիվ լուծում: Կարծում եմ՝ հենց այսօր է, որ ծնողներն ավելի լավ ու խորապես են գիտակցում, թե ինչ է սեռական դաստիարակությունը, քան առաջներում, երբ երեխաների հետ նման թեմաների մասին խոսելն անգամ համարվում էր ամոթալի, և վերջիններս լավագույն դեպքում ամեն ինչ խեղաթյուրված գույներով իմանում էին բակից, ավագ ու «փորձառու» ընկերներից: Մեր ծնողներից քանի՞սը կարող է ասել, որ ընտանիքում սեռական դաստիարակություն է ստացել, որ կարդացել է համապատասխան գրականություն, որ այդ հարցերը քննարկվել են դպրոցում: Դրա հետևանքով մեր ավագ սերնդի շատ ներկայացուցիչներ «փակ աչքերով», առանց գիտակցելու ,թե ինչու և ինչպես, ամուսնանում էին, զավակներ ունենում... որովհետև այդպես պիտի լիներ, այդ էր ուղին: Իսկ այսօրվա պատանիներն ու աղջիկներն ավելի լավ են գիտակցում իրենց սեռը, նրա նշանակությունը, դրա հանդեպ իրենց պատասխանատվությունը, իրենք են որոշում՝ երբ և ինչպես նոր կյանք ստեղծել իրենց «զավակատանը»:
Շատ երկրներում, 10 տարեկանից սկսած,երեխաներն անգամ դպրոցում են անցնում սեռական դաստիարակության դասընթացներ, որպեսզի վաղ տարիքից սկսեն գիտակցել իրենց սեռն ու դրա նշանակությունը. չէ՞ որ սեռական դաստիարակությունը սկսվում է հենց սեռի ու գենդերի նշանակության սերմանմամբ, և հետո միայն անցնում սեռական հարաբերությունների ու սեքսի հարցերին:

Ես հիշում եմ, թե ինչպես, երբ 11 տարեկան էի, մայրս ինձ նվիրեց «Երիտասարդ կնոջ հանրագիտարան» անունով մի գիրք, որտեղ ես կարող էի գտնել ինձ հուզող բոլոր հարցերի գիտական պատասխանները և ապա քննարկել այդ ամենը իր հետ, որպեսզի ավելի լավ հասկանամ դրանց նշանակությունը: Շատ շնորհակալ եմ իրեն դրա համար:

Ինչ վերաբերում է սեռական կյանքը սկսելու տարիքային ազատությանը, ապա այն ամեն մեկի անձնական գործն է, և վաղ սեռական կյանք սկսողները, ինչպես նաև նրանք, ովքեր սկսում են այն ուշ տարիքում, եղել են, կան ու կլինեն, անկախ նրանից, թե ինչ է պրոպագանդվում: Միակ տարբերությունն այն է, որ այժմ մարդիկ գնում են այդ քայլին ավելի գիտակցորեն, և ոչ թե որովհետև «խաբնվել են», ուրեմն նաև ավելի մեծ է պատասխանատվության գիտակցումը:

Կնոջ ստորացումը կամ բարձրացումը հենց կնոջ ձեռքերում է, և որպեսզի այդ թեռքերն ամուր լինել, դեռ մանկուց ծնողներն ու հասարակությունը պիտի օգնեն երեխային սեռական դաստիարակության հարցերում:

[Առողջագետ]

Շատ ուրախ եմ պատասխանի համար, և բոլորովին էլ չէի ուզում ասել, թե սեռական դաստիարակությունը պետք չէ, այլ հակառակը. կուզեի ավելին, ավելի խորը ու բարձր գիտելիք ու գեղեցկության զգացում "տար" հասարակությունը իր երիտասարդին ու աղջնակին: Այդ գիտելիքի պակասը չեմ զգացել թերևս բժշկական մասնագիտության պատճառով, սակայն ինձ հաճախ են դիմում երիտասարդ աղջիկներ և կանայք տարբեր խնդիրներով /հորմոնալ խանգարումներ, չբերություն և այլ հիվանդություններ/, և միշտ նկատել եմ, թե ինչ անսահման հետաքրքրությամբ և նույնիսկ ինչ-որ հպարտությամբ են լսում, նայում նկարները և զարմանում, որ մի այդպիսի գեղեցիկ և իմաստուն համակարգ ունեն իրենց մեջ:
Ընդհանրապես, կարծում եմ, որ շատ վաղ ժամանակներում մենք էլ, ինչպես բոլոր հին ժողովուրդները, անպայման պիտի ունենայինք այդպիսի գիտելիքի աղբյուրներ, սակայն ինչպես բոլոր կրոնները, այնպես էլ քրիստոնեությունը միտում են ունեցել` ճնշելով մարմնականը բարձրացնել մարդու հակառակ բևեռը` ոգեղենը, դարերի մեջ ճնշել ու ձգտել է նվաստացնել մարմնականը, և շատ աղբյուրներ ոչնչացվել են: Կարծում եմ, որ սա այսօրվա սեռական պրոբլեմատիկայի պատճառներից մեկն է ամբողջ աշխարհում: