Հոգևոր հայրերը կոչ են անում բոյկոտել «Դա Վինչիի ծածկագիրը» ֆիլմը
ՀՈԳԵՎՈՐ ՀԱՅՐԵՐԸ ԿՈՉ ԵՆ ԱՆՈՒՄ ԲՈՅԿՈՏԵԼ ՚ԴԱ ՎԻՆՉԻԻ ԾԱԾԿԱԳԻՐԸՙ ՖԻԼՄԸ
Վերջին օրերին մեծ աղմուկ հանած Դեն Բրաունի հեղինակած ՚Դա Վինչիի ծածկագիրըՙ գիրքը եւ վերջինիս հիման վրա նկարահանված համանուն ֆիլմն այսօր քննարկման առիթ էր հանդիսացել Արարատյան թեմի առաջնորդարանում:
Քննարկմանը մասնակցում էին եկեղեցու սպասավորներ, երիտասարդներ, հոգեբաններ: Նրանք միաձայն կոչ արեցին բոյկոտել ֆիլմի դիտումը եւ զերծ մնալ ավելորդ հետաքրքրասիրությունից: Իսկ Մայր Աթոռ Սբ. Էջմիածինը զգուշացնում է, որ ՚Դա Վինչիի ծածկագիրնՙ իր բովանդակությամբ հակասում է Սուրբ Գրքի եւ Եկեղեցու Սրբազան Ավանդության վարդապետությանը, խեղաթյուրում քրիստոնեական ճշմարտությունները:
Հրաչյա Աճառյանի անվան համալսարանի ուսանողական խորհրդի նախագահ Խաչիկ Հարությունյանը նույնիսկ կարծիք հայտնեց, որ գիրքն ու համանուն ֆիլմը կարող են մեծ հարված հասցնել հայ եւ համաշխարհային քրիստոնեությանը: ՚Ֆիլմում փորձ է արված երկնայինը երկրային դարձնելՙ,- ասաց նա եւ առաջնորդվելով լատինական ասացվածքով` ՚Պետք չէ խոսել, այլ գործելՙ ու առաջարկեց զգուշացնել կինոդահլիճների տնօրինությանը` ֆիլմի ցուցադրումից առաջ եւ հետո նշել, որ Հայ Առաքելական եկեղեցին դեմ է:
Տեր Տաճատ ավագ քահանա Դավիդյանն իր կողմից ավելացրեց, որ եթե արգելվի ֆիլմի ցուցադրումը, ապա դա ամենամեծ գովազդը կլինի: Նա բերեց ամերիկացիների օրինակը, որոնք կինոդահլիճների մուտքի մոտ գրքույկներ էին բաժանում, որտեղ նշված էին ֆիլմում թույլ տված պատմական բոլոր սխալները եւ այդպիսով բոյկոտել են ֆիլմը: ՚Դա նաեւ հարմար առիթ էր եկեղեցու քարոզչության համար: Մենք Դեն Բրաունի հեղինակած գրքերի նման գործերին անվանում ենք ՚օդանավայինՙ, դատարկաբանություն, որոնք փորձում են մարդու խելքի հետ խաղալ: Գրքում քրիստոնեությունը ներկայացված է իբրեւ հակամարդկային, հակաֆեմինիստական: Նա ոչ աստավածաբան է, ոչ պատմաբան, ընդամենը երկրորդական վարժարանի անգլերենի ուսուցիչ, եւ ֆիլմն էլ ոչ միայն անչափ ձանձրալի է, այլեւ որեւէ արժեք իրենից չէր ներկայացնումՙ,- ասաց տեր Տաճատ ավագ քահանան:
Առաջնորդանիստ սուրբ Սարգիս եկեղեցու հոգեւոր սպասավոր տեր Հակոբ քահանա Խաչատրյանի կարծիքով էլ` ֆիլմը թերարժեք է, ստեղծվել է զգայական հիմքի վրա եւ բացասական նպատակներով, այն է` տարածել հակաքրիստոնեկան գաղափարներ, խեղաթյուրել համընդհանուր ընդունված ճշմարտությունները: ՚Ոչ թե գայթակղությունն է վախեցնում, այլ մերժելի է այն երեւույթը, երբ կասկածի տակ են դրվում 2000 տարվա ճշմարտություները, հոգեւոր ժառանգությունը: Սիրելն այս աշխարհում ամենադժվար բանն է, այս ֆիլմով հեղինակները կարծես փորձել են արդարացնել իրենց մեղքերըՙ,- նշեց նա: Հակոբ քահանան հրապարակայնորեն կոչ արեց` ֆիլմին վերաբերել իբրեւ կոնկրետ հեղինակի մտահղացման, որն իրական հիմքերից զուրկ է:
Երեւանի թատրոնի եւ կինոյի ինստիտուտի ուսանողական խորհրդի նախագահ Էմին Թորոսյանն էլ ավելացրեց, որ թե գիրքը, թե ֆիլմը շահույթ ստանալու նպատակ ունեն, այդ ամենին բիզնեսի տեսանկյունից են մոտեցել: ՚Դա է պատճառը, որ միտումնավոր կեղծիքներ են ներմուծել ֆիլմ` որպեսզի եկամուտ ստանան, ինչը նրանց մոտ լավ է ստացվել: Հիմա Դեն Բրաունը միլիարդատեր է դարձելՙ,- նկատեց նա: Իսկ հոգեբան Նանա Խաչատրյանի կարծիքով` ֆիլմը մեծ ազդեցություն չի ունենա մարդկանց վրա, կարող է ազդել օրինակ` որոշակի կյանքի խնդիրներ ունեցողների վրա, բայց դա եւս ժամանակավոր է:
www.a1plus.am
Մեջբերել