Չարլզ Չապլին

[Philosopher]

Համաշխարհային կինեմատոգրաֆի, ընդհանրապես` արվեստի խոշորագույն դեմքերից մեկը, մարդու ու նրա հոգու մեծ երգիչը, մեծ երազողը, որն իր փորքամարմին հերոսի կերպարում խտացրեց իր երազը ու ուղղեց մարդկությանն իր կոչը` մարդու ու մարդկայնության մեծ երազի մասին, մարդ լինելու երանության մասին: Չապլինի յուրաքանչյուր ֆիլմով բացահայտվում է մարդու, իսկական մարդու գոյության մի նոր, որքան հին, այնքան նոր ասպեկտ: Բացառիկ հանճարեղ դեմք:

Այստեղ կարող եք դիտել Չապլինի կոչը մարդկությանը, որը նրա հումանիզմի խտացումն է` "Մեծ դիկտատոր" ֆիլմից:

Ո՞ր ֆիլմերն եք դիտել ու դիտում, որո՞նք եք սիրում ու գնահատում, ինչպիսի՞ն է ձեր Չապլինը

[Առողջագետ]

Չապլինի երևույթն այնքան անչափելի է, որ դժվար է դրան արժանի գնահատական տալ: Այդ փոքրամարմին մարդու, տղամարդու մեջ այնքան քնքույշ ուժ կա, այնքան գեղեցկություն, այնքան հանճարեղ սեր, կյանքի խորագույն ընկալում` որ ակնհայտ է դառնում, որ Մարդը իր մեջ Տիեզերք է կրում:Ամենից շատ զարմացնում է, երբ տիտրերից տեղեկանում ես, որ ՆԱ ոչ միայն սցենարի հեղինակն է, ռեժիսորը, գլխավոր դերակատարը /երբեմն երկու դերերի կատարող/, այլ նաև կոմպոզիտորը` հանճարեղ երաժշտության հեղինակը:
Ասելիքի գեղեցկության, նրբության և խորության առումով դժվար է նրա կողքին մեկ այլ անուն դնել, մնում է միայն զարմանալ, թե ինչ շռայլ կարող է լինել Բնությունը և որքան խտացված Սեր, Իմաստություն և Գեղեցկություն պարգևել մեկ հատիկ մարդկային հոգուն, ապա Նրա միջոցով այն սփռել աշխարհով մեկ:
Դժվար օրերի ընթացքի մեջ ունեցեք Նրա ֆիլմերի հավաքածուն, կարծում եմ, նա ձեզ կօգնի իր մեղմ ժպիտով ու նուրբ հումորով: