Բարի գալուստ ԴՆ Ֆորում

[Philosopher]

Ողջունում ենք Ձեզ ԴՆ Ֆորումում` կենդանի կյանքի Ձեր անկյունում, որտեղ կյանքը կենդանանում է ինքնա- և աշխարհաճանաչողությամբ, գեղագիտությամբ, մշակույթով, մարդկային երկխոսությամբ, իրական, կենդանի երկխոսությամբ: ԴՆ Ֆորումը ստեղծվել է իրենց քաղաքում ապրող իսկական մարդկանց համար, նաև` իրենց քաղաքը իրենց հոգում` հողային այլ հայրենիքներում ապրողների համար, իր քաղաքում իրեն իր տանը զգացող այն երիտասարդի ու երիտասարդացող ավագի համար, ով

- մերօրյա իրականության գորշությանն ու գաղջությանը հակադրում է սեփական հոգու իմաստությունն ու պատանեկությունը,

- ով ազգային մշակույթի մութ անկյուններին հակադրում է սեփական հոգու ֆիեստայի բաց երկնքի լույսը,

- ով, իր կյանքով, իր մտածողությամբ, իր զգալու, ապրելու ու վերապրելու ձևով ստեղծում է մերօրյա իրական Հայաստանը` պետական ու ազգային-մասսայական Հայաստանին հակադրվող Հայաստանը,

- ալտերնատիվ Հայաստանը, իմաստուն տոնի Հայաստանը:

ԴՆ Ֆորումը ստեղծվում է` ապացուցելու համար, որ երբեմն էլ իսկական մարդիկ կարող են կյանք կերտել, կերտել իրենց միջավայրի, իրենց երջանկության կյանքը, որի լույսը պիտի ցրի հասարակական ապատիայի մշուշը ու մարդկայնության ափեր վերադարձնի հարյուրամյակներով մարդկայնության դեֆիցիտ ունեցող հանրությանը:

ԴՆ Ֆորումը տարիքային հասցեատեր չունի, ԴՆ Ֆորումի հասցեատերը որոշվում է հոգու երիտասարդության մակարդակով, մարդկային երկխոսության ունակության բարձր չափանիշով:

ԴՆ Ֆորումը գալիս է ցրելու այն պատկերացումը, որ հանրային պահանջարկը սոսկ կենդանական-ցածր մշակույթն ու նույնքան ցածր մարդկային ու հասարակական հարաբերություններն են: ԴՆ Ֆորումն ունենալու է իր չափանիշը և համոզված է, որ մի օր այդ չափանիշը դառնալու է համընդհանուր չափանիշ, մարդկայնության կենսականության հաստատման սահման ու նպատակ:

ԴՆ Ֆորումը գալիս է ասելու ներկայի և անցյալի մշուշում թաղված, իր ուղին չգտնող երիտասարդին ու ավագին. "Եկել է ժամանակը ապրելու, Կյանքը հրաշալի է, Ազատ եղիր, Տուր ձեռքդ, գնացինք..."

ԳՆԱՑԻՆՔ ԿԵՆԴԱՆԻ ԿՅԱՆՔԻ ԱՓԵՐ` ԱՊԱԳԱՅԻ ԱԶԱՏ ՀԱՆՐՈՒԹՅԱՆ ՄԵԾ ԵԼՔԻ ԵՐԱԶԱՆՔԸ ՄԵՐ ՀԱՅԱՑՔՆԵՐՈՒՄ:

Գնացինք...

[HayQ]

Ողջունում եմ հերթական հայալեզու ֆորումը: Շատ ուրախ եմ, որ նման ֆորումներն աստիճանաբար ավելանում են. նման «մրցակցությունը», եթե երևույթն այդպես թույլ կտաք անվանել, կնպաստի ֆորումների հոգեբանափիլիսոփայական մակարդակի որակական առաջընթացին, ինչը ոչ այլ ինչ է, քան՝ հիանալի փաստ:

Պահական չէ, որ առաջին հաղորդագրությունս հենց այս թեմայում որոշեցի «անմահացնել»:

Ինձ շատ հետաքրքիր է՝ ինչ է նշանակում «ԴՆ»: Նախապես շնորհակալ եմ:

Հուսով եմ և նույնիսկ՝ հավատացած, որ «առողջ» քննարկումների մասնակից կդառնամ և, ամենակարևորը, դրական տրամադրվածությամբ բոլոր այլ՝ հին ու նոր մասնակիցների համար կկարողանամ էլ ավելի հաճելի մթնոլորտ ստեղծել: Ի սկզբանե ասեմ, որ տաքարյուն ազգ ենք, բայց դա ինձ համար երբեք խոչընդոտ չի հանդիսացել անհրաժեշտության դեպքում քննադատորեն արտահայտվել թե՛ «լավ» և թե՛ «վատ» հարաբերական հասկացությունները թե՛ դրական և թե՛ բացասական շեշտի ներքո քննադատելու համար: Այնպես որ, խնայեք առաջին հերթին ձեր նյարդերը և փորձեք համաձայնել, որ բանավիճել դեռ չի նշանակում վիճաբանել:

Ինչևէ, ողջույն բոլորին և շնորհակալություն հայկական ևս մի հաճելի «որևէ բան»-ի համար:

[Tigris]

Ողջոյն, Հայք,
Ես էլ մտածել եմ ԴՆ-ի իմաստի մասին եւ ըստ ինքեան հասել եմ հետեւեալ եզրակացութեան. ազգանունների սկզբնատառեր են:
Գրագէտ գրառումդ, յարգելի Հայք (կամ Հայկ), ուրախալի է. յուսով եմ քեզանից շատ բան կսովորեմ:
Բանավիճել եւ վիճաբանել... առաջինի պարագայում վիճում են, երկրորդի պարագայում բանում, աշխատում ու մտածում են: Ճի ՞շտ եմ:
Մաղթում եմ քեզ հաճելի մթնոլորտ ստեղծես եւ օգտակար քննարկումներ ծաւալես:
Նորից շնորհակալութիւն եմ յայտնում գրագէտ գրառման համար:

[HayQ]

Ողջույն Տիգրիս,

Շնորհակալ եմ պատասխանի համար: Անունս Հայկ է: «Հայք» մականվամբ պարզապես գրանցված եմ կայքում:

Վիճաբանել և բանավիճել բառերի շուրջ քո եզրակացությունը լիովին արտահայտում է բառերի փիլիսոփայության տրամաբանական վերլուծութունը, սակայն, հաշվի առնելով հայերեն լեզվի՝ երբեմն ավելի խորը փիլիսոփայական, քան տրամաբանական հատկությունը, հետևյալը կասեմ: Այդ երկու բառերը բառակապակցություններ են՝ բաղկացած երկու բառարմատից:
Բանավիճել բառի առաջին արմատը բան բառն է, երկրորդը՝ վիճել, վիճաբանել բառի առաջին արմատը՝ վեճ, երկրորդը՝ բանել: Ես կփորձեմ առաջին բառարմատը անվանել «գլուխ», երկրորդը՝ «պոչ» և, հաշվի առնելով հայկական ժողովրդական ասացվածքը՝ «Ձուկը գլխից է հոտում», ինչպես նաև, հաշվի առնելով բան բառի իմաստային հարուստ էությունը, կստացվի, որ ավելի լավ է բանը վիճել, քան՝ վեճը բանել: Քանզի, եթե կա բան (գործ, միտք, խոսք և այլն), ապա վիճել կնշանակի համաձայնություն փնտրել, իսկ եթե կա վեճ (կռիվ, հակառակ համոզմունքները բռնի ուժով ստիպել ընդունելու փորձ), ապա բանել լավագույն դեպքում կնշանակի բռնանալ ուրիշի կարծիքը կամ համոզմունքը:

Ստացվում է, որ ավելի լավ է բանավիճել, քան՝ վիճաբանել:

[Philosopher]

Ողջույն, Հայք Ողջույններս, բարեկամ Տիգրիս

Հաճույքով կարդացի երկու հայ մարդու ողջույնները: Հաճելի է ձեզ տեսնել այստեղ, ողջունում եմ ձեզ

Ողջունում եմ քո մուտքը ԴՆ Ֆորում, Հայք, անվանակից Քեզ ցանկանում եմ իմաստուն ու հաճելի զրույցներ, խորհեր ԴՆ Ֆորումում

Ֆորումի անվան մեջ ԴՆ-ը իմ ծնողների ազգանունների սկզբնատառերի միացությունն է. Դռնոյան - Նալյան: Նրանք նաև այս ֆորումի հիմնադիրներից են, անդամներից (Հեղինակ, Առողջագետ) և ոչ միայն այս ֆորումի, այլ Հայաստանում բազմաթիվ նոր գիտական, փիլիսոփայական, բժշկական, ընդհանուր առմամբ` աշխարհայացքային սահմանների բացող ու առաջամարտիկ

Սա մի ընտանիքի կողմից ստեղծված անկյուն է, որտեղ մարդիկ կարող են խորհել ու զրուցել էական հարցերի շուրջ, էականորեն ու խորը, պատասխանատու ու ազատ

Շնորհակալ եմ, որ միացել ես մեզ Կհանդիպենք

[Առողջագետ]

Այսօր հունվարի 13-ն է.շնորհավորում եմ բոլորի հին Նոր Տարին, երջանիկ կլինեմ, եթե Այսօրվանից մեր սիրելի ֆորումը նոր շունչ առնի և շարունակի կատարել իր առաքելությունը: մենք բավականին լուրջ ջանք ենք դրել ֆորումի կայացման գործում, սակայն ինչ-որ պահի ինչ-որ պատճառներով "հոգնեցինք", էներգիան հանգեց, և... ֆորումը անցավ գրեթե հանգստի ռեժիմի:
Շնորհակալություն եմ հայտնում այն քիչ նվիրյալներին, որ պահեցին անթեղված կրակը. նախևառաջ մեր հին բարեկամ Տիգրիսին, որի գրառումները ջերմացնուն էին հոգիս, երբ ինքս գրեթե չէի մասնակցում ֆորումի կյանքին:
Ոցջունում եմ նորերին, որոնց դեռ չեմ ճանաչում, սակայն կարծում եմ, որ ջերմ բարեկամներ կդառնանք:
Նոր Տարում Նո~ր Կյանք մեր սիրելի ֆորումին:

[Tigris]

Բարի վերադարձ, յարգարժան Առողջագէտ: Ես Հեղինակին էլ կարօտեցի: