Ծխելու խնդիրը դրված է, բայց լուծված չէ
Ինտերնետում հանդիպեցի մի գիրք, որը բեսթսելլեր է և կոչվում է "Ինչպես հեշտությամբ ազատվել ծխելուց", և այս առիթով որոշեցի այս թեման բացել, առավելևս որ այս խնդիրը հաճախ է կանգնում իմ հիվանդներից և ծանոթներից շատերի առջև:
Ահա այս երիտասարդ կինը, որ պայքարում է, ձգտում ազատվել այդ սովորույթից, որը թույլ չի տալիս առողջանալ, վերացնել տհաճ զգացումները, բերանի խոռոչի աղի-թթու տհաճ համը:
Աղիողորմ խնդրում է օգնել... ես էլ ջանում եմ անել հնարավորը. նինվեի տերևով թուրմ նշանակում, ողողումներ, իսկ հոգեբանական բեկումի համար տալիս եմ ծանոթանալու Չոպրայի նկարագրած մեթոդին, որը վերցված է Այուրվեդայից և ինձ արդյունավետ է թվում, օգնել է շատերին:
Գուցե այս գիրքն էլ օգտակար կլինի շատերի համար, չէ որ հեղինակը 33 տարվա ծխող է եղել և օրվա ընթացքում, ինչպես ինքն է գրում, 60- ից մինչև 100 գլանակ է ծխել , ապա թողել, այս գիրքը գրել, դարձել աշխարհում այս ոլորտում ամենահեղինակավոր դեմքերից մեկը, նաև ստացիոնարների ցանց բացել...
Հաճախ եմ լսել ինֆարկտ տարած հիվանդներից. ի պատասխան իմ հարցին. "ծխու՞մ եք" նրանք խոստովանում են. "ոչ, ինֆարկտի օրը թողել եմ":
Միշտ հարց է առաջանում մեջս. այս ինչ զարմանալի արարած է այս մարդ կոչվածը. որ օր առաջ չի կարող հրաժարվել վնասակար սովորույթից, և միայն ճակատագրի ահեղ հարվածից է ուշքի գալիս, այն էլ ոչ միշտ:
Թվում է, թե աշխարհում հաջողությամբ է ընթանում հակածխախոտային պայքարը. որոշ օրենքների ընդունումից հետո Մեծ Բրիտանիայում միայն մեկ ամսում ըստ վիճակագրության 40.000 մարդ իբրև թե ազատվել են այս խիստ վտանգավոր հակումից. սակայն իսկապե՞ս դա այդպես է, թե նիկոտինից ազատվելով թմրադեղերին են կապվել շատերը... և ինչ ասելիք ունենք մենք այս ամենի առիթով, ով ինչ փորձ ունի և ինչ խորհուրդ մյուսին...
Եկեք խոսենք, իսկ ես դեռ շատ կարևոր օրինակներ ունեմ բերելու, նաև մեթոդներ` հակազդելու այս հակումին:
Մեջբերել